Քաղաքական բանտարկյալ Աշոտ Զաքարյանի կոչը հանրությանը
Սիրելի Հայրենակիցներ,
Հինգ ամիս է անցել այն ֆարսից, ինչն անվանում են ՀՀ նախագահական ընտրություններ, որի արդյունքում նախագահ չընտրված անձը հռչակվեց երկրի նախագահ, ուզուրպացնելով իշխանությունը` սեփական ժողովրդի կյանքի և արյան գնով, իսկ ժողովրդի մի մասին մինչ օրս պահում են բռնապետական զնդաններում: Այս ամենը խոսում է ներկայիս վարչախմբի թուլության ու տկարամտության մասին, քանզի նրանք չեն վայելում Հայ Ժողովրդի մեծ մասի հարգանքն ու վստահությունը:
Ներկայիս իշխանությունը նախկինի վերարտադրությունն է իր գործելակերպով, վարքով ու բիրտ բարքերով, ամենակուլ անմարդկային` իշխանական մամլիչ մեքենայի կերպարանքով, իշխանություններն այսօր սարսափած են համաժողովրդական հուժկու շարժումից, գիտակցում են, որ մոտ է հատուցման պահը և աստիճանաբար ընկրկում են արտաքին ճնշումների առաջ: Մեր հոգին ամուր է, կամքը` անկոտրում, ուստի, կոչ եմ անում ձեզ պայքարել ձեր իրավունքների և ազատության, հիրավի ազատ երկրում ապրելու համար:
Որպես Ձեր զավակն ու եղբայրը, հաղորդում եմ բոլորին, հունիսի 28-ին մասնակցեք Գյումրու ազատության հրապարակում կայանալիք հանրահավաքին ու ձեր ակտիվ մասնակցությունը բերեք ձեր իրավունքների և ազատության պայքարի գործում:
Քաղաքական բանտարկյալ` Աշոտ Զաքարյան
25 հուսիսի, 2008 թ.
Գրեք Ձեր կարծիքը